أكتر حاجه تخوف أي واحدة لما تعرف ان جوزها

انت مين ؟ او انتي مين !! وعايز ايه مني ؟! ساعتها قربت الموبايل مني واتنفست بصوت عالي عشان تسمع انفاسي بس واخليها تتوتر ان في حد سامعها ومش بيرد عليها.. بعدها قفلت المكالمة وقفلت الموبايل وتاني يوم حاتم اتصل بنور تاني عالضهر وانا سمعت المكالمة برضه وكان بيتفق معاها على انهم يتقابلوا تاني وبينبه عليها ا تقولش لريهام

ساعتها انا لبست ونزلت عشان اروح المكان اللي اتفقوا عليه وواضح انه مكان جديد عمرهم ما اتقابلوا فيه وصلت وفضلت مستنية بره بعيد عن الباب لحد ما وصلوا هما الاتنين وكانوا عمالين يتلفتوا ودخلت وراهم وقعدت بعيد وصورتهم تاني وطلعت من الباب بسرعه من غير ما ياخدوا بالهم

وطلعت عالبيت وبعت لنور صورها تاني وقفلت الموبايل.. ساعتها لقيت حاتم بيتصل بيا رديت عليه قالي انا طلعت بدري النهارده من الشغل وهعدي عليكي نخرج سوى قولتله ماشي جهزت وكلمني نزلتله وكان طول الخروجه سرحان سالته مالك ؟

قالي رنا انتي عارفه انا بحبك قد ايه ! بس احنا لازم نطلق..سكت شوية كده وقولتله ليه يا حاتم ؟ انا قصرت معاك في حاجه ؟ قالي انتي مش غلطانه في حاجه بس حاسس اننا اتسرعنا في جوازنا وشوفي انتي عايزة ايه انا مش هبات في البيت النهارده هرجع بيت أهلي وانتي لو عايزة تروحي عند مامتك براحتك بس.. قاطعته وقولتله خلاص براحتك وقومت وهو بينده عليا يفهمني ليه عايز يطلقني بس انا فعلا مضايقه وعايزة انتقم منه هو ونور

طلعت قعدت افكر المفروض هنا اعمل ايه ؟ بعدها قولت اروح لشقه نور اللي عايشه فيها لوحدها بعد ما اطلقت من جوزها من سنة ونص روحتلها البيت من غير ما اقولها رنيت الجرس اول ما فتحت وشافتني كانها شافت عفريت فضلت ساكته وعماله تقول في اسمي مالك يا رنا ؟ حكيتلها اللي حاتم عمله وهي عماله تقولي مش معقوله وازاي يعمل كده ؟ وبعدها كنت مخليا بالي كويس انهم ماتكونش ماسكه الموبايل واول ما الموبايل بتاعها رن راحت تمسكه صرخت فيها وقولتلها انتي بتعملي ايه ؟

شايفاني في الحالة دي ومش مركزة معايه وبتردي عالموبايل لقيتها سابت الموبايل وما ردتش عليه وكانت بدات تتوتر قولتلها انا اسفه يا نور بس اعصابي تعبانه ممكن تعمليلي حاجه اشربها قالتلي اه طبعا ودخلت المطبخ دخلت واراها وهي واقفه قدام البوتوجاز ولقيت طبق زجاجي كبير محطوط في شكولاته خدت الطبق ده وهي مدياني ضهرها وقومت ضرباها على دماغها الطبق اتكسر وهي وقعت غالبا ماتت !!

فضلت اعيط واتنفس جامد بس مافيش حاجه هتشفي غليلي غير اني انتقم منها بنفسي.. جريت عالموبايل بتاعها وكنسلت على حاتم وجيت ابعتله رساله عالواتساب لقيته الموبايل عايز البصمة خدته وروحت على نور وهي غرقانه في دمها في المطبخ وحطيت صوباعها عشان يفتح البصمه وفعلا فتح وبعت لحاتم تعالالي البيت حالا

رد عليا قالي في ايه ؟ مش قولتيلي بلاش تيجي البيت كتير عشان الجيران !؟ بعتله قولتله تعالى حالا عايزاك ضروري وامشي بعدها.. قالي خلاص جايلك.. فضلت مستنيه مش عارفه اعمل ايه ؟ بس قلبت عند نور في المطبخ لقيت شاكوش كبير خدتة وقفلت الترباس بتاع باب الشقه لان في احتمال كبير يكون معاه المفتاح