أكتر حاجه تخوف أي واحدة لما تعرف ان جوزها

رجعت اسمع المكالمه تاني لقيته بيقولها وحشتيني وعايزين نتقابل واتفقوا على معاد بكره يتقابلوا فيه عالعصر بعد شغله مع انه قايلي شغله بيخلص بليل اللي مضايقني انه قالها المطعم اللي بنتقابل فيه وقال اسمه وماعرفش مكانه فتحت النت ودورت على فروع المطعم ده ولقيت ليه 3 فروع واقرب فرع لشغل حاتم هو اللي موجود في مدينة نصر فقررت اروح على هناك قبل الميعاد بنص ساعه عشان لو مطلعش الفرع ده الحق اشوف الفروع التانيه

حاتم رجع لقاني سيبت الفيلم اللي كنا بنشوفه ونايمه ووشي للحيطه فدخل نام عادي وسمعته بيهمس يارتني ماقفلت بحسبك صاحيه.. مسكت نفسي من العياط عشان عايزة امسكه تاني يوم متلبس.. فضلت صاحيه طول اليوم لحد ما صحي ونزل الشغل وانا نمت شويه وصحيت لقيت فاضل ساعه عالمعاد !!

قومت بسرعه ولبست ونزلت والطريق كان زحمه وانا مش عارفه لما اشوفهم هعمل ايه ؟ ! وصلت فعلا متاخره ربع ساعه واول ما وصلت دخلت المطعم بحذر عشان ما يشوفنيش قبل ما اشوفه ولما دخلت جوة بصيت لقيت...

بصيت لقيت حاتم ونور قاعدين مع بعض وبياكلوا وبيضحكوا للحظة وقفت ومقدرتش ادخل عليهم فضلت واقفه شوية وبعدها طلعت موبايلي وصورتهم وهما قاعدين مع بعض ومشيت انا لو واجهته دلوقتي مش هيكون كفايه ليه ولا لنور كان لازم اشوف حل تاني اقوى من كده قعدت افكر وانا في الطريق لحد ما وصلت تحت البيت اشتريت موبايل تاني وشريحة جديده وخدت الصور دي وبعتها لنور وقفلت الموبايل

فضلت مستنيه لحد ما رجع حاتم بليل وكنت مجهزة الغدا وكان بيحاول كالعادة يهزر ويفتح موضوع يتكلم فيه بس لقاني ساكته ساعتها حاولت اجاريه بالكلام واقوله اني تعبانه قالي تحبي تروحي المستشفى قولتله لا انا تمام وتلفونه فضل يرن وهو يعمله سايلنت ومارضتش اسئله مين اللي بيتصل بيك بعدها قام ورد وانا سمعت المكالمه نور بتعيط وبتقوله في حد مصورنا وبعتتله الصور وهو بيحاول يهديها وبيقولها حاولي تتصلي عالرقم ده وقالها انتي قولتي لمين اننا نازلين قالتله كنت قايله لريهام

ساعتها عرفت ان ريهام هي كمان عارفه الموضوع ده بس هو ساعتها اضايق وكان متعصب بس عمال يهمس عشان صوته ما يعلاش ويقولها ازاي تعرفي حد تاني اننا بنتقابل قالتله ريهام صحبتي وماتوقعتش منها تقول لحد قالها صحبتك قدامك بس انتي ما تعرفيش ايه في نيتها !!

كنت مستغربه الكلام قوي اتنين خاينين بينصحوا بعض وبيأمنوا للناس وهما ماحدش يأمنلهم أصلا.. في اخر المكالمه قالها انا هتصرف كعادته وجالي الصاله حسيت على وشه ملامح الخوف والتوتر.. ساعتها قولتله مالك يا حاتم 

بصلي وعينه كل ما تيجي في عيني يوديها الناحية التانيه وعمال يبلع ريقيه ويحط ايده على بقه كتير وهو بيتكلم كلها في لغة الجسد اشارات ان الشخص اللي قدامك ده بيكذب عليك.. بس سيبته يتكلم وقولتله اكيد ضغط الشغل

قالي ايوه اليومين دول عندنا ضغط رهيب وبعدها قام دخل الحمام ودخل ينام.. فتحت الموبايل التاني وانا عملاه سايلنت لقيت ان فيه مكالمات كتير جاتلي من رقم نور.. اتصلت بيا اول ما تحت رديت عليها وفضلت ساكته لقيتها بتقول الو ؟!