قصة دكتورة صيدلانية كاملة جميله جدا جدا

أهو ورا الستارة

بصيت للستارة لقيت رجلين طفل صغير

واقفه وراها وباينه من تحت

لسه هروح ناحية الستارة واشدها

لقيت أميمه واقفه ورايا وبتقولي.

في حاجه يا دكتورة إيمان

اتخضيت وانا بقولها

لا مفيش..خدت ملك وقولتلها

تصبحي على خير

رجعت الشقة وانا حاسه انه في حاجة غلط بتحصل

الطفل دا أكيد مخطوف..انا مش لازم أسكت

مش هودي بنتي من تاني عندهم

وهحاول اشوف طريقة اتاكد انهم خاطفينه فعلا

ولسه موجود قبل ما يهربوه

نيمت ملك في حضني الليلة دي وخفت اسيبها لوحدها

بس قبل الفجر بساعه كدا قلقت وملقتش ملك جنبي

ملك..ملك روحتي فين !!

جريت على أوضتها..لقيتها قاعده بتلعب

مع الدبدوب؟

انتي ايه صحاكي دلوقت

ميدو يا مامي شدني من إيدي وقالي تعالي

نلعب في اوضتك عشان متقلقش مامتك

ميدو ؟؟ وهو راح فين

استخبى هناك جوه الدولاب

فتحت الدولاب بسرعه ولقيته مستخبي

قلبي أتقبض لما شوفته..قفلت الدولاب بسرعه

وفضلت اتنفس بصعوبه وبعدها فتحته تاني

انت دخلت هنا از...!!

اتفاجأت..ولساني اتشل لما لقيته أختفى

فضلت أدور وسط الهدوم..ولكنه زي ما يكون فص ملح وداب

اخدت ملك في حضني وجريت على اوضتنا

وقفلت الباب من جوه..وقولتلها اوعي تبعدي عني

مهما حصل..انتي فاهمه ؟

حاضر حاضر يا ماما

تاني يوم كنت فكرت في خطه وقررت أنفذها..

اخدت ملك عندهم وسبتها وطلعت بالليل عشان اخدها

وقعدت عندهم شوية