قصة شرايط العهد قصه ممتعه جدا

لغاية قبل نهاية فترة الملاحظة بتلات ايام لما كنت نايم على سريري في الأوضة الإنفرادي اللي شبه أوضة السجون

لقيتها جات وقفت جنب راسي

بصورتها الحية الجميلة

ووطت على راسي

وانا نايم لغاية ما قربت منها أوي وقالت

_انت الوحيد اللي عارف الحقيقة

وبعدها رجعت اتعدلت وحاولت تلمس ايدي لكن ايدها عدت من ايدي زي الطيف لما وشها اتحول فجأة لصورتها الميته المتآكلة

وقالت بصوت غريب عن صوتها كإنه صوت جاي من تحت المية

_يرضيك كدة

فانتفضت من سريري

زي ما أكون بصحى من كابوس

لكن كنت حاسس إن دي فعلا الحقيقة

وإني لو قدرت اثبت ان دي هي الحقيقة

من خلال قضية البنت نفسها

يبقى هتأكد من حقيقة اللي جوايا

شرايط سحر الكتان

سحر الفراعنة القديم

ففضلت اجاهد في اليومين الأخيرين من أيام الملاحظة عشان احاول اسيطر على وساوسي وارتب افكاري بخصوص كل المستجدات اللي بتظهر

أه كانت الوساوس مستمرة وافكاري بتهرب كل شوية لكن فضلت أحاول اني اتماسك

وفي آخر يوم من أيام الملاحظة قابلت....

الدكتور ولما قعدنا سوى جاهدت اكتر عشان أظهر كشخص طبيعي وقت ما كان الصوت دا بيحاول بكل عزم يشتت افكاري

فقلت للدكتور بعد ما اطمن عليا وعلى اقامتي

_لو انا بفترض حكايات وبألفها، هعرف منين ان البنت ليها مرات أب وهي من بلد غير بلدي وماعرفهاش قبل كدة،،ومن قبل ما تظهر الحقيقة دي..

فابتسم ابتسامة باردة

=حكايات اضطهاد البنات في السينما والروايات مقرونة دايما بمرات الأب وطبيعي مع خبرة عقلك في تأليف حكايات الأشباح تفترض انها كانت مضطهدة من مرات اب وهي اللي اتسببت في قتلها وعادي جدا انك تفترض ان ابوها غايب،، كانت فرضية موفقة يعني

وقتها ظهر الصوت من ورايا

....على فكرة ابرار زمانها مبسوطة اوي بحبستك دي

لكن اتمالكت نفسي ومالتفتش ورايا على الرغم من إنه قطع حبل افكاري وفضلت ثواني استجمع نفسي تاني لما سألت الدكتور

_طب ابوها قال إنها كانت محبوسه في أوضة فوق السطوح؟؟

=ماعرفش

_طب اكيد حضرتك بينك وبين النيابة تواصل، ممكن تخليهم يحققوا مع أبوها وامها والبحث الجنائي يدور في الأوضة اللي فوق السطوح

=شكلك هتحتاج فترة علاج اطول

_ماعنديش مشكلة

=يا ابراهيم المتهم اتمسك خلاص وناس شهدت عليه،، وناس شهدت ان البنت اتكرر هروبها وانها كانت بتعاني من اضطرابات نفسية

.....أيوه يا ابراهيم، المتهم هيعدموه وانت هتفضل هنا محبوس طول العمر

المرة دي التفت ورايا لما سمعت الصوت فالدكتور ابتسم لكن كملت كلامي