زواج باطل

زي ما هي اتهان كرامتها حتي لو مكانتش بتحبني انا كمان اتهان كرامتي يبقي كده خالصين كل واحد فينا راح لحاله وخلصنا

وقرب مني وهو ماسك دراعاتي الاتنين وبصلي في عيوني بتحدي وقوه وهو بيقول من بين أسنانه : - وزي ماهي في النهايه رجعت للي بتحبه انا كمان هرجعك ليا برضاكي أو غصب عنك ياريمان

قال جملته اللي خلت قلبي يتنفض من نبره صوته وإصراره اللي كان باين في عيونه وبعد عني وهو بيكمل سواقه

اما عني دموعي كانت نازله علي خدي زي الشلال ،كنت بحاول استوعب كم الص.دمات اللي نازله عليا وكأن العالم كله أصبح ضدي

حطيت وشي بين أيدي وفضلت اعيط بدون صوت ،كنت حاسه قلبي هيقف من كتر الحزن والخذلان اللي شوفته علي ايد اقرب الناس ليا

بعد مده مش طويله وصلنا قدام العماره

بصيت حوليا بصمت وتعب وانا بحاول أجمع قوتي المسلوبه عشان اقدر أواجه اللي جاي واللي مش عارفه مخبي ايه تاني !!

نزل من العربيه ولف يفتحلي الباب فرفعت راسي ابصله بملامح خاليه من اي تعبير

اتنهد ومدلي أيده وهو بيبصلي بندم وحب واشتياق

ضحكت بسخرية وانا بتجاهل أيده الممدوده وبنزل من العربيه وبرزع الباب بكل قوتي

وبكل جراءه قربت منه وانا برفع راسي وببص في عيونه بكل تحدي وبقول وانا بضغط علي كل حرف : - اوعي تفتكر اني هسامحك بسهوله اوعي تفتكر اني ممكن اسامحك اصلا متنساش انك السبب في كل اللي بيحصل ده متنساش انك سيبتني من ست سنين اوعي تنسي يابدر اوعي تنسي انك اكتر شخص كسرني في الدنيا

اوعي تنسي أن في رب اسمه منتقم جبار اوعي تنسي أننا هنقف قدامه يوم القيامه وهحكيله عن قد ايه وجعتني وظلمتني واني عايزه حقي منك 

واوعي تفتكر اني ضعيفه عشان كده وافقت اكمل معاك انا وافقت عشان حاجه واحده بس عشان احسسك بالندم كل دقيقه وكل ثانيه هتشوف وشي فيها عشان اعيشك اللي عيشتهولي اضعاف مضاعفه

عشان احسسك قد ايه الظلم وحش وفي النهايه انت اللي مش هتقدر تستحمل انت اللي هتطلقني بكامل إرادتك بعد ما تكون فقدت آخر ذره تحمل