سكريبت جديد كامل بقلم تقى بدر
قربت منه _ مشوار هعمله بكرا هتأكد من حاجه ووعد هحكيلك.
هز رأسه بتفهم _ هتعملى أكل ولا مكتئبه؟
اليوم خُلص، ماكنتش متخيله لو مكانش موجود كان أيه هيحصل لو ماكنتش لقيت حد أتكلم معاه بعد ماأترفضت !
دخلت نمت، صحيت الصبح صحيته قبل ماأنزل _ نازله لحد المستشفى نتيجه التحاليل طلعت.
_ تحاليل ايه؟
_ تحاليل الخِلفه والكلام دا..
قاطعنى_ عملتى تحاليل تانى؟ مش قولنا هنرضى!
_ لا دى التحاليل الأولانيه، كلمونى فالمستشفى قالولى أنها انها كانت أتلغبطتت.
_ بجد؟
أبتسمتله_ بجد، أجيبلك حاجه وأنا راجعه؟
_ أستنى أستنى انا نازل معاكِ.
فالحقيقه ماكنتش رايحه المستشفى عشان نتيجه التحاليل بس، لأن المُمرضه كلمتنى وقالتلى أنها طلعت عاديه وكله تمام، أنا كنت نازله عشان أعرف اي حاحه عنه، أى معلومات توصلنى لحد من أهله.. كنت عايزه أرجعه لحياته.
_ هدخل أتكلم مع المُدير فكام حاجه، تستنانى هنا؟
_ايه الكام حاجه دول؟
_ طيب أقولك ؟ تدخل معايا بس مهما سمعت جوه ماتنفعِلش وتستنى لما نطلع وهقولك كل حاجه ماشى؟
_ طيب مهديلى عشان شكلى مايبقاش وِحش قدام الراجل.
_ لاء أنت شكلك زى الفل ماتقلقش هو عارف كل حاجه..
_ عارف كل حاجه!
_ ماهو مدير المستشفى إللى كنت بتتعالج فيها يا عُمر صحصح معايا.
قبل مايرد السكرتيره طِلعت بلغتنا أنه نص ساعه وهيبقى معانا وأننا نقدر نستناه_ هنزل أجيب قهوه من الكافتريا عشان اليوم شكله طويل.
_ هاتلى سحلب!
رفع حاجبه_أيه؟
بصيتله _ سحلب ياعمر !
ضِحك ونزل، كلمت رؤى عشان أعرفها بالخطوه الجايه، على الأقل تطمنى!
_ كنت لسا هكلمك!
_ ليه فيه ايه؟
ردت بحماس_ الشخص اللى عندك فالشقه دا.
_ عُمر ماله؟
_ عرفتلك كام معلومه عنه كدا الواد طِلع...
قاطعتها_ عرفتيلى منين؟
_ يا بنتى البت أميره، انتِ نسييتى أن خطيبها ظابط، أتحرى عنه.. وقبل ماتسألى بعتتله صورته وقبل ماتسألى برضو جابتها من جروب الوتساب الل محتواه أتغير وبقى عباره عن صورك معاه.
رديت بقلق_ طِلع متجوز؟
_ وب...
_ خاطب؟
_ماهو...
_ مرتبط؟
_ أدنى فرصه أتكلم وحياه أمك ! أحنا مانزلناش سألنا عنه جيرانه دى تفاصيل أكيد مواصلنلهاش! كل إللى عرفناه أنو من عيله تقيله أوى.. وأنه ثرى ثراء فاحش.
_ حرامى!
_ فكرنا فكدا الأول بس لاء، طِلع باحث كميائى.. بيعمل مُنتجات طبيه وبيبيعها.
أبتسمت بهيام_ قلب أمه مُثقف.
_ ياترى رد فِعله هيبقى أيه لو عرف، أنتِ مش خايفه؟
_ لاء، دا بيحبنى.
_ لما يعرف الحقيقه ويكتشف أنك خدعتيه، هيكرهك!
_ فكل الاحوال هو هادى، وعاقل، ووحنين! مايتخافش منه.
أتنهدت_ كان أيه اللى وقعك فدا كله بس.
_ القدر يارؤى القدر
_ مش هتقولى لأحمد الحقيقه؟ وأنك كنتِ متفقه مع الدكتور!
_ لاء، فيه حاجه جوايا مابقتش قبلاه، بقيت حاسه أن فيه حاجز ببنا.
_ يابنتى هتخسريه والله، دا شخص مُتحضر، وغنى، ودمه خفيف
قاطعتها_ أحمد ينفع صاحب، ماينفعش زوج يارؤى.. أنتو مبسوطين بيه عشان راشقكوا فأى خروجه، بيحللكوا مشاكلكوا ويقفلكوا فيها، بتعرفوا تهزرو وتاخدوا وتدوا معاه.. لكن انا فعلًا دا ماينفعنيش انا عايزاه ليا لوحدى.
