كامل قواي العقلية

كارمن… بس انا معرفش حد
انس…متقلقيش المحكمه لو مفيش حد معاها هتجبلها محامي…بس لازم الاول هي تتكلم لان للاسف موقفها ضعيف…وللاسف هي عدت 18 يعني لو قبل كده كان كبيرها كام سنه سجن فالاحداث لكن هي ادام القانون بلغت والأسف هتتحاسب…

كارمن…طيب ممكن اشوفها لو سمحت..
دياب… نادي عالعسكري.
العسكري…تمام يا افندم…
دياب….انزل هات المتهمه من الزنزانه.

العسكري وهو بيأدي التحيه العسكريه…تمام يا افندم…
دياب….. انا هجبها هديكي وقتك تتكلمي معاها ولو ان ده ممنوع.. بس هخليكي تأعدي معاها وياريت تحاولي تخليها تتكلم وحتي لو هي اللي عملت كده. حاولي تعرفي منها السبب لان اكيد في سبب..ويمكن ده يخفف عنها العقوبه..

كارمن…حاضر ان شاء الله هتتكلم…
ثواني…وخبط العسكري ودخل وفأيده لمار… كأنها انسان آلي بتتحرك مع اي حد من غير ما تنطق…
العسكري…تمام يا افندم المتهمه..

شاورله دياب..وخرج العسكري..
جريت عليها كارمن…خدتها في حضنها وهي منهاره…
تابع دياب وانس تصرف لمار… كانت عامله زي الاموات مبتديش اي رد فعل…

حتي بعد ما حضنتها كارمن…مبدلتهاش الحضن وقفت ثابته وسرحانه في دنيا تاني…
قام دياب..وقف… هو وانس…
دياب…لكارمن…هسيبك معاها شويه… عشان تكونو براحتكم.
هزت كارمن راسها …شكرا لحضرتك..
دياب…العفو..
خرج دياب مع انس…عشان يسيبوها براحتها يمكن تتكلم…

راح دياب علي مكتب انس..
انس…ايه رأيك…لسه عند كلامك.شايفك يعني متعاطف معاها…

دياب… لا عند كلامي يمكن اكون متعاطف بس بنسبه بسيطه… شغلنا يا انس مش هكلمك عليه انت عارفه كويس بيمر علينا اشكال كتير وبيمر علينا قضايا غريبه لايمكن عقل يستوعبها. وبنتعاطف معاها بس بعد التحقيقات بنتفاجئ بالحقيقه…
يعني باختصار مش كل اللي قلبك يتعاطف معاه تصدقه لان القلب بطبيعته مابيخونش يا انس… ديما شايف نص الحقيقه..

انس… بس مينفعش نلغيه ياصاحبي.
دياب…مين قال نلغيه بس فالقضايا اللي من النوع ده لازم
نحكم عقلنا شويه.. ومنمشيش ورا احساسنا وعواطفنا.. احنا هنا عشان نعرف الحقيقه يا انس…ايآ كانت ايه هي..وطبعا لو طلعت بريئه ساعتها يبقي احساسنا كان صح وهنقدر نساعدها لاكن لو طلعت مزنبه يبقي لازم تتحاسب..وساعتها هنبقي صح ومشاعرنا مضحكتش علينا.

انس….بتعلم منك ديما ياصاحبي.
دياب…كلنا بنتعلم من بعض يا انس.
انس…بس حسيت انك متعاطف معاها.وكلام صاحبتها هزك.

دياب…مش هنكر ده خصوصا انها قضيه معقده بالنسبالي.
صاحبتها بتشكر فالاب والبنت لدرجه انها شكت في سلوكه لانها مش لاقيه سبب.
انس…طيب مش يمكن ده يكون سبب. خصوصا يعني ان مراته اعده علي كرسي متحرك وكده..شيطان يعني

دياب…جايز جدااا الشيطان يعمل اوسخ من كده.. بس حاسس ان الحوار اكبر من كده… ياريتها تتكلم…لان للاسف موقفها ضعيف…ومفيش حد عنده الحقيقه كامله غيرها هي وابوها وامها…

انس…بقولك ايه…بعيدآ غن المحاضره اللي انت لسه مديهاني عن العواطف دي بس برده البنت صعبانه عليا.
دياب…بردو مفيش فايده…عموما هنشوف..

كارمن…خدت لمار واعدت بيها عالكنبه…وهي لسه علي حالتها باصه في الفراغ…
كارمن…دموعها نازله وحزينه علي حال صحبتها وحاسه انها في حلم ازاي كانو مع بعض من كام ساعه كانت بتضحك وتهزر وكلها حيويه. وفجأه تنطفي بالمنظر وكل الموارث دي تتحط فوق راسها…

كارمن… لمار.. لمار حبيبتي ردي عليا طمنيني عليكي…
لمار……….
كارمن…ردي عليا ارجوكي. انتي علب طول بتتكلمي مينفعش تيجي الوقت وتسكتي..لمار… لازم تتكلمي ياحبيبتي قولي انك معملتيش كده قولي مين اللي عملها وحتي لو انتي لازم تقولي عملتي كده ليه لان اكيد في سبب قوي يخليكي تعملي كده..

لمار عشان خاطري بلاش الاستسلام ده انا عمري ما شوفتك بالحاله دي ابدا… ارجوكي يا لمار متستسلميش
ارجوكي اتكلمي انتي عارفه ايه اللي مستنيكي الاعدام يالمار…طيب قوليلي هتسيبي امك لمين انتي عارفه انها محتجاكي اكتر من اي حد فالدنيا طيب هتسبيني انا لمين يا لمار انا مليش غيرك…انتي صحبتي واختي وامي وكل حاجه ليا فالدنيا لمار انا بقوي بيكي. وانتي بسهوله عايزه تسبيني طب هتسبيني لمين..

لمار عشان خاطري قولي اي حاجه قولي عملتي كده ليه…انا مش قادره اصلا استوعب انك تكوني عملتي كده….عمو خالد ده كان روحك..وانتي روحه طيب قوليلي حصل ايه فالنص ساعه اللي سبتك فيها يخليكي تعملي كده…قوليلي ايه السبب اللي ممكن يوصلك لكده لمار. انا مش قادره انطقها بس صدقيني معنديش بديل…عمو خالد حاول يقرب منك.حاول يعتدي عليكي…كارمن وهي دموعها نازله وسرحانه في وش لمار

اللي مفيش فيه اي رد فعل..
كارمن…انا مش لاقيه اي حاجه اقولها او تيجي في بالي غير دي… يعني يمكن عشان طنط ناريمان تعبانه بقالها فتره الشيطان ضحك عليه…وكملت بعياط انا اسفه انا عارفه انه استحاله يعمل كده بس غصب عني دماغي واقفه مش لاقيه اي حاجه غير دي مش لاقيه حد اتكلم معاه غيرك…

بس لو ده صح لازم تتكلمي يالمار لازم صدقيني هيبقي دفاع عن النفس وهتخرجي منها..ارجوكي يالمار قولي اي حاجه…ولو خايفه علي زعل طنط ناريمان هي كده كده كانت معاكي واكيد شافت كل حاجه حصلت وصدقيني هتموتيها بايدك لو متكلمتيش…

هي محتجاكي اوي…وانا محتجاكي اوي..متضيعيش نفسك ومستقبلك وتدمري حياتك فكري عشان خاطري مهما كان السبب اللي مخليكي ساكته..لازم تتكلمي مينفعش تسكتي..

لمار………….
كارمن…بانهيار… وهي بتهزها بقوه عشان تتكلم. اتكلمي قولي اي حاجه..
خبط الباب..فاللحظه دي ودخل دياب وانس…